lunes, 30 de mayo de 2022

La santina de L'Acebu


Santina, la de L'Acebu,
tienes el tronu en natura,
pal más vieyu ya pal nuevu,
tu yes la virxe más pura.
¡Viva esta virxe serrana
y tamién, la Madalena!
Si vies con noxu en mañana,
marches de tarde ensin pena.
Nun hai n’España santina,
santina tan milagrera,
dende la primer mocina,
sanara xente con xera.
De neno, sentáu nun bancu,
contra atrás cayí de llombu,
salvé’l ribayu o barrancu
ya nun aportara combu.
¡Viva L’Acebu y la cruz
ya’l so partíu de Sierra!,
onde la promesa aduz
per esa bendita cerra.

lunes, 6 de diciembre de 2021

De Tinéu a Ponferrada


 

De Tinéu a Ponferrada

marchanon cuatro arrieiros,

como nun vendienon nada,

arreyanon per carreiros.

 

Al chegar a L.leitariegos

iguanon cama con paya

ya con texíos sariegos

ensin pasar de la raya.

 

Cuatro !!obos que xubían

dende’l va!!e de L.laciana,

comienon, mientras dormían,

l’almuerzu de la mañana.

 

Con Ponferrada al algame,

ríanse los sous vecinos

de qu’acarretaban fame

arrieiros ya pollinos.

domingo, 7 de febrero de 2021

Bruxas


     Había un taxista en Madrid qu’aseguraba que caltenía amistá con una bruxa de las de la Veiga’l Palu ya que lu trespandaba de baldre tolos branos fasta un pueblu del conceyu Cangas. Yo nunca viera esnalar una escoba sí, sotripar, pero bien seguru qu’hailas que vuelen nun discretu serviciu discrecional ente esa capital ya’l Principáu, yá qu’a los asturianos paez que nun−ys importa muitu que retrasen tolos años el ramu de los túneles de la variante ferroviaria.  Haya o non escobas voladoras, nun teáis dulda de que bruxas hai abondas, a las que quiero dedicar esti afayadizu cantar pa que muevan la cadarma.


miércoles, 2 de diciembre de 2020

La Casa las Aguas


 

Si pola natura naguas,

defende’l llar ya la faza,

tamién la Casa las Aguas,

el raigañu ya la raza.

 

Los ríos, viescas ya montes,

los cuentos, sones, historias,

regueiros, llagunas, fontes

ya’l monasteriu de Courias.

 

La nuesa fauna gregaria,

vezos ya mitoloxía,

cola llingua milenaria

qu’afalaga en poesía.

 

Flora de valles ya altos,

qu’aporta cura ya arume,

horros, sableras ya saltos,

baxo la nublina en cume.

 

Esos castros o castiellos,

la ilesia, ponte, palaciu,

esi grandor de Muniellos,

el norte, l’orbayu, el xaciu.

 

Museos ya caserías,

el miel, los güertos, castañas,

los dólmenes ya las vías

sobro minas soterrañas.

 

Cola bayura del oru,

que nos pue trayer llaceria,

si se saca ensin decoru,

finando vida ya güeria.

 

El futuru ta na tierra,

la tierra pola que naguas,

si la esqueices, ella berra,

como la Casa las Aguas.

 

 

martes, 29 de septiembre de 2020

Per Sierra


 Nun me presta un res l’encamientu de la grafía “!!” de l’Academia pa representar la “ch” vaqueira; sicasí, la emplego col envís de nun dixebrar.

De Xunqueras a Tinéu,

xúrotelu pola vida,

nunca viera nada feu,

nin de Parada a La Pruída.

 

Dende Courias a Dagüeñu,

del parador a L.linares,

la túa vida ía sueñu

d’asitiao nesos !!ugares.

 

Muitu se sufrióu na guerra,

pero bien supo alitar

la xente’l Partíu Sierra,

el más guapu p’afayar.

 

¡Viva San Pedru Culiema!,

¡viva Ounón ya La Veiguie!!a!,

por ser curiosa la fema,

anque seya abondo viecha.

 

¡Viva La Venta por xarros!,

¡Viva La Braña d’Ordial!,

pende son prietos los barros

ya cortexé de chaval.

 

¡Viva, viva Serrantina!,

Bornazal ya Borracán,

L’Acebu cola santina

ya esos pueblos pol sou pan.

 

Vi!!aouril, Ounón, Siasu

ya la parroquia Maganes,

naciera’l miou pá al pasu

a la escontra de Santianes.

 

Ente Cangas ya Tinéu,

ente Somiedu ya Ayande,

de Tabladie!!u a Medéu,

vas esfrutar a lo grande.


viernes, 3 de julio de 2020

Gelipollas




Teo un vecín de Tresmonte tan precavíu que toma’l café por ósmosis a traviés de la mazcarita. Ía’l casu qu’esti paisanu anda siempres reburdiando de que los de l’alministración deben de pensar que somos “gelipollas”, yá qu’alvierten del peligru por nun guardar la distancia en chigres, axuntanzas ya sableras, pero nun dicen nada de los metros ya trenes enfarxopetaos de xente que tresporten al tayu en Madrid n’hora punta ensin queys dea pola gana reforzar el serviciu.

martes, 3 de marzo de 2020

San Fagondu



Si acaso vas a San Fagondu,
cola boina bien calada sobre’l pelo.
Si acaso vas a San Fagondu,
verás L’Acebo allá nel finxu’l cielu.

P’aquellos que tornen a San Fagondu,
 pel branu que ye'l momentu del amor,
na carretera de San Fagondu
cortexando nun van sentir remor.

A traviés de tola parroquia,
a naide estraña la súa xente,
magar que’l que namora boquia,
porque va tar d’ella pendiente.
Ía un nuevu sentimientu,
con esi ciñu n’aumentu,
nalarás como nun cuentu.

P’aquel que vien a San Fagondu,
amás que la boina la cabeza ambura,
tornará de San Fagondu
auquiera n’ayén por culpa la guapura.

lunes, 24 de febrero de 2020

Ablucan cola Iniston



     ¡Güelu visti a la Iniston! Según Telva y Pinón, ablucan colas frebas del banduyu de Xuana Iniston a los sous 51 años. Abúltaseme que seya por aventar muermos ya flemas por aciu del so componente mucolíticu. Del “six pack” nada soi a albidrar por culpa de que nun lu garro dafeitu.

viernes, 27 de diciembre de 2019

Morriera Sevilla.



     Dexónos Sevilla con 91 años. Una gran perda pal conceyu de Grau. Xosé Lluis Barna tuviera tola vida venceyáu a la casa conceyu y a la propia biblioteca de la villa ya abúltaseme que nun habrá naide nella que nun lu conociera. Sentí dellas anéudotas quey asocedieron colos guah.es nesas dependencias y que Sevilla siempres supo componer con bon xeitu. Coincidí bien de veces con él nel Exprés, onde díbemos a almorzar. Él cubría crucigramas mentanto yo lleía la prensa o encoplaba dalgún poema n’otra mesa a la so vera. Tamién charrábemos y ríamos; sicasí, recuerdo con gran emoción cuando colos sos güeyos llenos de llárimas me comentó que morriera la so muyer. Sí, Sevilla, cubrió Grau de sorrisas, pasatiempos y bonas alcordanzas. Hai yá más d’un añu que Nando Fernández asoleyaba esta melguera biografía del fináu nas páxinas de La voz del Trubia que güei recupera y que yo comparto na so memoria. ¡Fuelga en paz, amigu!

domingo, 22 de diciembre de 2019

¡Salú!


     Como siempres, nesti día, deseavos muita/muncha salú a toos. Nun esmolezáis porque como a la mi muyer nun vos tocara nada nel sortéu de Navidá yá que vais poder siguir tirando los cuartos nel de Reis. Encamentar que la llotería nacionaliega, las quinielas, la primitiva, el bonolotu, euromillones y toa esta triba d’apuestas al ser del Estáu nun provocan nenguna clas de vezu nin de viciu.

martes, 26 de noviembre de 2019

Guapia'l Narcea



Güel la moza a lavanda,
el mozu a espliegu,
si tras la moza anda
como’l rapiegu.

El cebollu Pousada
nunca güel mal
con lavanda semada
nel pebidal.

Nun esqueiza la xente
esti pueblín,
porque produz inxente
el cebollín.

Nun naciera en Pousada
nenguna fea.
Cola ponte pasada,
guapia’l Narcea.

Son Santianes ya Tuña
el mesmu edén,
onde desenfurruña
quien eiquí vien.

Alhucema o cantuesu,
l’arume abarca,
arrodia’l banzáu nuesu,
el de la Barca.

En Merillés ya Tueres,
baxo la fana,
hai mui guapas muyeres,
flor d’hortolana.



miércoles, 13 de noviembre de 2019

El desodorante



     A Xabelón, que marchóu pa Uviéu nel coche llinia pa visitar a un pariente, sey asentóu a la vera la muyer más flera de la parroquia. Foi'l casu que nel intrey entrugóu por si enantes tuviera cebando los gochos na cubil. Xabelón, que ta mui preparáu, decatárase aína de la mala zuna de la pregunta ya pidiera nun comerciu de la capital el torga golores más fuerte que tuvieran. La verdá ye que foi un aciertu yá qu'agora, qu’esparde’l Zotal puru pelos sobacos, nin sey arima la más meticona nin nenguna outra.